admin
رئيس مجلس اداره المنتدى
عدد المساهمات : 2174
نقاط : 12005
التقييم : 4
تاريخ الميلاد : 02/12/1987
تاريخ التسجيل : 12/08/2009
العمر : 36
تعاليق : تخيل في يوم اختفيت
و رنيت عليا و ما رديت
و جالك خبر اني انتهيت
و وقفت على قبري و بكيت
يا ترى ساعتها هتقول كنت بحبك!!!!!!!!
و لا هتقول استغنيت؟؟؟؟؟
 |  موضوع: ممكن أعرف مين هو ربنا ؟؟  2010-03-10, 12:48 | |
| ممكن أعرف مين هو ربنا ؟؟؟؟
بسم الله الرحمن الرحيم ، وبه نستعين ، وصلى اللهم على خير الذاكرين والشاكرين محمد وعلى اله وصحبه وسلم ....أما بعد
أحنا لما عرفنا يعنى ايه الفلوس ، وإزاى بالفلوس تقدر تحل كل مشاكلنا وأمنياتنا أصبح هدف حياتنا هو إننا نجمع فلوس....ولما عرفنا يعنى ايه مناصب وإزاى ممكن توصلنا لحاجات كتير بقى هدف حياتنا إننا نحقق مناصب..............لكن
لو عرفنا يعنى ايه ربنا...وإزاى هو قادر على انه يحل كل مشاكلنا ويحقق لنا كل مطالبنا وينعمنا فى الدنيا وكمان الاخرة....هيبقى هدف حياتنا إننا نرضى ربنا....اللهم علمنا وإهدينا يارب يا عليم يارب العالمين
...................
بإختصار هى دى مشكلتنا ..إننا مش عارفين يعنى ايه لا إله الا الله ، {فَاعْلَمْ أَنَّهُ لَا إِلَهَ إِلَّا اللَّهُ وَاسْتَغْفِرْ لِذَنبِكَ وَلِلْمُؤْمِنِينَ وَالْمُؤْمِنَاتِ وَاللَّهُ يَعْلَمُ مُتَقَلَّبَكُمْ وَمَثْوَاكُمْ }محمد19
ومش عارفين مين هو ربنا ، ممكن نكون بنصلى وبنصوم وسمعنا عن الجنة وعن النار وعن الحرام وعن الحلال ، ولكن المفروض قبل كل دول إننا نعرف مين هو ربنا......
معرفتنا بربنا هتخلينا لما نرفع إيدينا ونقول ياااااااارب...نعرف إحنا بندعى مين.
معرفتنا بربنا هتهون علينا كل مصيبه وهتحسسنا بكل نعمة وكل بلاء...وكمان هتثبتنا على دينه.
تخيل لو انت فى أمتحان ...ودخل دكتور الماده وقعد جنبك وقالك متخفش وهساعدك فى كل حاجه انت عايزها...يترى شعورك هيكون إزاى؟؟؟ هتكون مبسوط وفرحان وقلبك مطمئن ...مش كده؟؟؟
تخيل بقى ...ولله المثل الأعلى... ربنا معاك فى الدنيا دى اللى هى زى الامتحان وواقف جنبك يترى مش هتبقى عايش مبسوط ومطمئن ...فصدق الله فى قوله
{(الَّذِينَ آمَنُواْ وَتَطْمَئِنُّ قُلُوبُهُم بِذِكْرِ اللّهِ أَلاَ بِذِكْرِ اللّهِ تَطْمَئِنُّ الْقُلُوبُ }الرعد28
..............
سيدنا موسى لما كان بيجرى هو ومن أمن معه فرارا من فرعون وقومة... أيقن المؤمنين إنهم خلاص هيتقبض عليهم
{(فَلَمَّا تَرَاءى الْجَمْعَانِ قَالَ أَصْحَابُ مُوسَى إِنَّا لَمُدْرَكُونَ }الشعراء61
يقوم يرد عليهم سيدنا موسى ويقولهم
{(قَالَ كَلَّا إِنَّ مَعِيَ رَبِّي سَيَهْدِينِ }الشعراء62
كلا ...متخفوش ؟؟؟ إزاى منخفش وفرعون خلاص قرب مننا....
بس عشان سيدنا موسى عارف مين هو ربنا ، وعارف قدرته وميقن إن ربنا مش ممكن يسيب عباده المؤمنين....فينزل المدد من ربنا فى الحال
{(فَأَوْحَيْنَا إِلَى مُوسَى أَنِ اضْرِب بِّعَصَاكَ الْبَحْرَ فَانفَلَقَ فَكَانَ كُلُّ فِرْقٍ كَالطَّوْدِ الْعَظِيمِ }الشعراء63
سيدنا موسى عارف هو بيدعى مين...
.......................
ومن أعظم الايات اللى ممكن تعرفنا مين هو ربنا ، أية الكرسى
ونبدأ بأولها (اللّهُ لاَ إِلَـهَ إِلاَّ هُوَ)
كلمة الله تعنى : الذى يحار فيه العقول
وكلمة الله كل الكون يعرفها ، وكل المخلوقات ، ولما بتقولها كل حاجه بتخضعلك وبتسلم من أى شر ، عشان كده سيدنا محمد صلى الله عليه وسلم علمنا نقول :بسم الله الذي لا يضر مع أسمه شىء فى الارض ولا فى السماء وهو السميع العليم....
........
كل واحد مننا قلبة بيتخطف لما يسمع عن موضوع شاغله ، زى الطلبة لما يسمعوا نتيجتهم أو المليونيرات لما يسمعوا عن فشل او نجاح صفقاتهم
أما المؤمنون اللى بحق فقلبهم بيتخطف لما يسمعوا كلمة الله
{(إِنَّمَا الْمُؤْمِنُونَ الَّذِينَ إِذَا ذُكِرَ اللّهُ وَجِلَتْ قُلُوبُهُمْ وَإِذَا تُلِيَتْ عَلَيْهِمْ آيَاتُهُ زَادَتْهُمْ إِيمَاناً وَعَلَى رَبِّهِمْ يَتَوَكَّلُونَ }الأنفال2
.............
(لا إله إلا هو)
أى لا معبود بحق إلا هو ، لا يعظم إلا هو ، لا يحب إلا هو ، لا يخاف إلا هو ، لا يستعان إلا به ، لا يرجى إلا هو
يعنى بالبلدى كده ، ملناش غيره
لو أنت فى مشكلة كبيرة هو بس اللى ممكن يحلهالك ، لو أنت تايه فى الصحراء هو بس اللى ممكن يرشدك ، لو انت ملقى فى بئر كما فعل بسيدنا يوسف عليه السلام فهو بس اللى ممكن يخرجك وينجيك ، لو أنت فى النار كما فعل بسيدنا إبراهيم هو وحده بس اللى ممكن يخلى النار بردا وسلاما عليك
يعنى بالبلدى برده ،،، أحنا ملناش غيرة
ويوم القيامة مش أبوك وأمك بس اللى هيفروا منك ، لا دى أعضائك كمان هتستغنى عنك
{يَوْمَ تَشْهَدُ عَلَيْهِمْ أَلْسِنَتُهُمْ وَأَيْدِيهِمْ وَأَرْجُلُهُم بِمَا كَانُوا يَعْمَلُونَ }النور24
الملايكه هيسجدوا لربنا ويقولوا يارب سلم يارب سلم
سيدنا أدم هيقول يارب لا أسألك اليوم إلا نفسى
مفيش حد ممكن ينجيك من اليوم ده إلا هو
بكلمة واحده منه تبقى غنى أو تبقى فقير
بكلمة واحده منه تبقى سعيد أو شقى
بكلمة واحده منه تدخل الفردوس أو تدخل سقر
لا إله إلا الله
............
(الْحَيُّ الْقَيُّوم)
تخيل لو طفل دخل على أمه وقالها يا أمى هو احنا هناكل منين النهارده ، فخرج ابوه زعلان وقاله بصوت عالى : عيب يابنى تقول كده طول ما انا حى فمتشلش هم حاجه.
ولله المثل الاعلى ...كأن ربنا بيقولك عيب تشيل هم أى حاجه فى الدنيا طول ما هو حى.
طيب مش ممكن يكون الاب ده حى بس صحته على قده وميقدرش يوفى بطلبات بيته.
قربنا يقولك إنه هو الحى القيوم
وربنا ذكر الحى قبل القيوم ، لأن لو رب الاسرة مات هتبقى مصيبة ، لأن هو اللى بيأكلهم وبيحميهم وبيصرف عليهم ، فربنا بيقولنا إته هو الحى الذى لا يموت......
أما معنى القيوم : أى الذى يحتاج إليه كل شىء فى كل شىء ولا يحتاج لشىء فى أى شىء
فربنا هو القائم على كل شىء فى الدنيا........
طيب مش ممكن يكون ربنا حى وقيوم وقادر على كل شىء بس يغفل عنى فى وقت أنا محتاجه فيه ؟؟؟؟
فيرد ربنا ويقول
(لاَ تَأْخُذُهُ سِنَةٌ وَلاَ نَوْمٌ)
قوم موسى سألوا موسى عليه السلام وقالوا : هل ينام ربك؟
فربنا أوحى لسيدنا موسى وقاله أمسك يا موسى قارورتين وأفضل ماسكهم طول الليل ، فمسكهم طول الليل لغاية ما غلبه النوم فوقعوا منه ، فسمع ربنا بيقوله
يا موسى... سألوك هل أنام..... ، لو كنت أنام لهلكت السماوات والارض كما هلكت هاتين القارورتين....
لا إله إلا الله
.................
طيب مش ممكن يكون ربنا حى وقيوم ومبيغفلش على خلقه أبدا ، بس مش عنده اللى انا عايزة؟؟؟
فيرد ربنا بقوله
(لَّهُ مَا فِي السَّمَاوَاتِ وَمَا فِي الأَرْضِ مَن ذَا الَّذِي يَشْفَعُ عِنْدَهُ إِلاَّ بِإِذْنِهِ)
يعنى كل خزائن السماوات والارض ملكه
لا إله إلا الله
..............
طيب مش ممكن يكون ربنا حى وقيوم ومبيغفلش وعنده كل حاجه بس ميعرفش أنا عايز إيه؟؟؟
فيرد بقوله
(يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلاَ يُحِيطُونَ بِشَيْءٍ مِّنْ عِلْمِهِ إِلاَّ بِمَا شَاء)
يالله.....الحمد لله على نعمة الاسلام ، والحمد لله إننا لنا رب عظيم
(وَسِعَ كُرْسِيُّهُ السَّمَاوَاتِ وَالأَرْضَ وَلاَ يَؤُودُهُ حِفْظُهُمَا وَهُوَ الْعَلِيُّ الْعَظِيمُ)
أية الكرسى حوالى 200حرف ، لو قرئتها بعد كل صلاة فليس بينك وبين دخول الجنة إلا الموت ، ولو قرئتها قبل ما تنام تحفظك من كل شر...
فأوعى تقطع علاقتك بيه ، أوعى تنساه وتغفل عن ذكره فينسيك نفسك
{وَلَا تَكُونُوا كَالَّذِينَ نَسُوا اللَّهَ فَأَنسَاهُمْ أَنفُسَهُمْ أُوْلَئِكَ هُمُ الْفَاسِقُونَ }الحشر19
أوعى يكون ربنا بالنسبالك تصلى وبس ، أوعى يكون ربنا عندك فى المسجد وبس
وأعرف إنك أنت اللى محتاجله مش هو اللى محتاجلك
وأعرف مقامه... وأعرف مقامك
خليك دايما معاه
واجب عملى
قوم إقرأ اية الكرسى دلوقتى وحس بكل معنى أتكلمنا بفضل الله عنه
أمسك كتاب ربنا وأقرأ وأعرف مين هو ربنا
لأنه أفضل كتاب يكلمك عنه.
اللهم أرزقنا لاخلاص فى القول والفعل والعمل
اللهم لك الحمد على ما يسرت لى من كتابة تلك الكلمات
إن كان هناك توفيق فما توفيقى إلا بالله عليه توكلت وإليه أنيب وإن كان هناك خطأ فإنه منى ومن الشيطان
وصلى اللهم على خير الذاكرين والشاكرين محمدا وعلى اله وصحبه وسلم
وأخر دعوانا ان الحمد لله رب العالمين
| |
|
sara
عضو نشيط
عدد المساهمات : 85
نقاط : 5488
التقييم : -1
تاريخ الميلاد : 08/09/1989
تاريخ التسجيل : 10/01/2010
العمر : 35
| | موضوع: رد: ممكن أعرف مين هو ربنا ؟؟ 2010-03-11, 12:21 | |
| ياحى ياقيوم برحمتك استغيث
تسلم على الموضيع الرائعه | |
|
