ثورة العيال

ثورة العيال

يا شباب الفيس بوك ياجامد ياشباب التغير
ياشباب كله عزة وصامد فى ميدان التحرير

كانو بقولو عليكو عيال كانو بيقولو هايفين
وقالو عليكو ملكوش لزمه قالو عليكو ضايعين

قالو وقالو قالو كتير ولا نقصت عزيمتكو
وياما قالو علكيو فرافير ونايمين فى بيتكو

وكان الواحد يسمع ارزل كلام

ليه قاعد عالنت ياواد انت هو ومستموت
بطل لعب وبطل رغى داهيه تكون بتشيت

روح اعملك حاجه مفيده ومتضيعشى فى وقتك
يابنى القعده دى مش هتفيدك ياحبيبى شوف مصلحتك

قلتو استنو وبكره تشوفو اد ايه احنا شداد
وشباب اتحرر من خوفه واهو جيه الميعاد

ولما جيه يوم التلات يوم خمسه وعشرين
نزل البت ونزل الواد اللى مش نافعين

على فين يابنى انت هو بطلو لعب عيال
قلتو احنا اللى هنغير والله احنا رجال

انت ياحبيبىانت اللى تغير عهد بقاله سنين
يلا ياشاطر ورونا و ادينا مستنين

نزل الشباب .. بقلوبهم الصافيه .. ومشاعرهم الدافيه وحماسهم العالى
بيقول سلميه مش عافيه وعل التحرير طوالى .............

قابلهم الغبا فى الطريق عايز يفرقهم
وبضحكة صفره وعين حمره ناوى يهزئهم

وكانو يكلمو فى الكبير متخافشى ياريس
ده شوية عيال طراطير جايه هنا تهيس

كانو فاكرينهم زى الكتاكيت هش فيتهشو
ولا شباب اهبل وعبيط هيخافو ويكشو

لقو قدامهم اسود شامخة ومستبسلة
ومستعده تموت وعشان ماتتحرر واقفه ومستقتله

وجت الاوامر للغبا اضرب بعصيانك
اضرب وعور وكسر موت فى اخوانك

لكن الشباب جامد والعصا منفعش
طب احدف قنابل مسيله يمكن بقى يغورو
لكن الشباب صامد واقف مبيسلمش

بدأ الغبا يغلب اضرب بمطاطى
ضحك الولد وقال ... والله لو الف طلقة لو سيل ماهنطاطى

بص الغبا واستغرب هنعمل ايه ما خلاص
يلا ياجندى انت وهو اضرب قوام برصاص

طلع الرصاص من البنادق يحصد فى ارواحهم
ضرب الغبا بغله حالف يرجعهم .........

سقط الشهيد فى الميدان برصاصهم الغادر
وبدمه يروى الارض دمك ياواد طاهر

هتفو زمايله بصوتهم والله ما نغادر
والله لنكمل.. والله مهما حصل ينموت ينتحمل
وهناخد بطار الشهيد وهناخد بطار الشهيد
باصرارنا وكفاحنا .. وعزمنا سلاحنا ... منخافشى على روحنا
ولو حتى نتقتل ...

وبص الشباب للغبا وفى نظرته تحدى
هتف الشباب ليهم هنفوت وهنعدى ..

خاف الغبا وانفزع قالك مفيش فايده
وبسرعه يلا ياجدع اهرب بقى ياجندى

هربو الفيران........ جريو وبخطوه مزعورة
هتف الشباب الله وبصيحه منصوره

وادى قاعده فى الميدان
وبصوت يزلزل جبل قالو .. فليسقط النظام
وزمان فى قالو فى المثل .. اياك وثورة شعوب مظلومة .. مقهورة

وهرب الفيران من الشوارع وفى لحظة هس مفيش
قال الولد لابوه طب مين هيحمينا ... يبنى الفيران ديه تجرى ومبتحميش
هى الفيران فالحة غير فى الضرب والتلطيش

يلا قوام يبنى وامسكلك الشومه ولو حد قرب من البيت.. اضرب ومتسميش
وفى ليلة نزل الجيش

وجاى من السفر برادعى مالكل جاى بيهيص
جاى من الطيارة بيدعى يارب ابقى رئيس
وناس كتير قاعده وبتركب الموجه
احزاب حركات ومعارضة يلا بقت هوجه

والكل فى الميدان يهتف بعلو الصوت
فليسقط التعبان كفانا ايوا سكوت

قالولو مفيش فايده ياريس لازم تداديهم
ارميلهم اى لقمة يمكن تراضيهم

فكر وقال طيب اتغيرى ياحكومة
وأدى كمان نايب .. وهنصلح وهنعدل ونحاسب المسئول

رد الشباب وقال وادى قاعده بلا قومه
ايك تكون فاكر ان احنا شباب اهبل او غبى او مسطول

رد وقال ياولاد ... سيبونى انا اكمل
انا البطل انا اللى حاربت انا الطيار
انا اللى كنت القائد لما عيشتو الانتصار
وهعيش واموت واندفن فى البلد ديه ... ايوا كلامى صدق وبجد مش بهزار

قالولو كفايه علينا تلاتين سنه فى الزل
متمسك بكام شهر ليه ده حقيقى انت تعل

مش كفايه علينا تلاتين سنه كابس
على نفسنا وعيشيتنا ضلمه وكوارث
شحتنا ياراجل لممتنا سبارس
والله لو تمشى حتبقى فل الفل

احتار خلاص الكبير قاعد بيتلوى
بيقول ده فى التحرير عيال بتتقوى

لازم اشوف صرفة اعمل انا حاجة
العبها انا بحرفه ماهى رزالة وسماجة

ونده وقال ياجمال ابعت فى حراميه
راكبين حصنه وجمال جامده وعفيه

وراحو عل الميدان الكلاب
راكبين بغال وحمير قال يضربو فى الشباب
ودخلو عل التحرير ولا غزوة الاحزاب

اه منكو يابهايم خلاص مفيش تفكير
دول مخافوش مالرصاص هيخافو من الحمير

هتف الشباب قاعدين لو حتى دمنا سال
لا طايقين نشوف وشك ولا وش الواد جمال

واهيه جايه جمعة زحف وحنجيلك ملايين
وهنخلعك عافية ونخلى عيشتك طين

وراحله الجيش وقاله لازم هتتنحى
قال انتو بتقولو ايه عايزنى انا اضحى

قالولو الشعب هاج وهيجى عل الفيلا
وهيخلعك بالغصب ويكسر وراك قلة

قال هى حصلت فيلا لااااااااا
الحق انا اجرى فيها ايه لو ابقى جبان
وادى خطاب التنحى روح قولو ياسليمان

وهتفو الناس من الميدان .......... وصاحو الله اكبر
الثورة خلاص نجحت وادينا بنغير

( أحمد السيد )

أرفع لك القبعة تقديرا على هذه الكلمات

كلمات جميله


بس انا قبعتى يا احمد مغسوله ومش لابسها

هههههههههههههه



كل التقدير




كل الحب

تمام اسال الله ان ينفع بك

اظن انه من الاصول انك لما تنقل اى حاجة لازم تقول مصدرها والقصيده دى كتبها الشاعر احمد الجمال وموجوده على اليوتيب بصوته يعنى لما تنقل حاجة وتقول انها بتاعتك متبقاش مكشوفة اوى والناس كلها عارفاها

وده رابط القصيده على اليوتيب بصوت الشاعر
https://www.youtube.com/watch?v=OYoT-ombLEo

مع احترامى ا/ احمد الجمال
انا لم اقل ان هذه القصيده من كتاباتى
انا نقلتها لانه عجبتنى
ولم اكن اعرف كاتبه
والمهم الموضوع نفسه
مش كاتب الموضوع مع احترامى الكامل ليك

احمد السيد



احمد الجمال



كل الحب