ميدان تحريرك ... ملهووش دعوه بالسياسه

ميدان تحريرك انت لا ليه لا دعوه لا بسياسه ولا باقتصاد ولا حتى ببرنامج طبق اليوم

ميدان تحريرك ليه دعوه بجمهورية نفسك وبس

س: يعنى ايه ميدان تحرير نفسى ؟

ج:يعنى مكان جواك انت محدش ينفع يدور عليه غيرك

مكان تتحرر فيه من حزنك ... ضعفك ... خوفك ... جبنك ... كل حاجه كل حاجه تحس انها حاجز كده بالنسبه لك

حاجه كده حاسس انها واقفه بينك وبين الحاجه اللى انت نفسك تحققها

يعنى مثلا يوم ما تلاقى نفسك بتقولك ايه : يا عم انت مفيش فايده منك ...كل شويه بترجع لربنا وتقوله يارب انا حرمت انا مش حعمل كده تانى وتطلع عيل وتبعد تانى عن ربنا وتنساه ؟؟

ساعتها لو معندكش ميدان تحرير حتاخد 2 قرص يأس مع فوار تشاؤم مع علبة دوا من عذاب النفس

لكن لو عندك ساعتها حتجرى على ميدانك وتقف فيه حتلاقى قدامك يافطه مكتوب عليها 3 حاجات :

1 : بسم الله الرحمن الرحيم

("قل ياعبادي الذين اسرفواعلى انفسهم لا تقنطوامن رحمة الله ان الله يغفر الذنوب جميعا انه هو الغفور الرحيم"

2:انت اعظم مخلوق عند ربنا ...ايوه ربنا بيحبك

3: ربنا بيفرح لما حد بيرجعله ربنا بيحب انك تغلط وترجعله وتقوله يارب سامحنى ربنا بيفرح لما بيلاقيك عارف ان ربك سبحانه وتعالى هوه الغفور الرحيم

ومثلا يوم ما تكون ماشى ف الشارع وتشوف مثلا حد بيشرب سجاير او انتى تشوفى بنوته مش محجبه يعنى اى حد قدامك انتى او انت احسن منه ف حاجه معينه

ساعتها لو معندكش ميدان تحريرك ده هتقول او نخليها هتقولى : ايه ده بصى البنت دى مش محجبه كده وايه ده لالالا انا احسن منها طبعا وتديها بقى كام كلمه وتقول لاصحابها انا مش عارفه دى ساكته ع نفسها ازاى ويا سلام بقى لو ده اب او ام وتلاقيه يروح مدى كلمتين ع اهلها زى الشهد

لكن لو عندك ميدان تحريرك انت : حتقف فيه وتلاقى جوهره مكتوب عليها اوعى تفتكرى او تفتكر انك احسن منه او انك احسن منها لا كل الحكايه ان ربنا عايزك انتى كده وعايزك انت كده بس وياريت تدعيلها او تدعيله ان ربنا يهديه او يهديها ياااه عالفرق الشاسع بين الموقفين

وهكذا لو انت حد فقير مثلا مثلا وكنت ماشى ف الشارع ونفسك تروح وبيتك بعيد ومش معاك اجرة تاكسى او مواصلات وتلمح كده بطرف عنيك واحد لابس بدله ايه وراكب عربيه ايه يااااه ملك فارس زمانه

لو معندكش ميدان تحرير هتقول كده

لكن بص بقى لو عندك : طبعا زى كل مره حتجرى وتقف فيه وتشوف يافطه بعيده مكتوب عليها بحروف بتلمع كده مكتوب فيها

محدش ف الدنيا دى فقير ايوه محدش فقير عارف ليه ؟ لان ربنا سبحانه وتعالى مش منم اسمائه انه فقير لا ده ربنا الغنى

اه انت يمكن تكون مش معاك فلوس بس اكيد ربنا رازقك بحاجه تانيه انت غنى فيها فبلاش بقى موضوع الفقرا والكلام ده لا احنا كلنا من صنع الله الله الغنى

قيس ع كده بقى حاجات كتييييييييييييييييييييييير ف حياتك

وشوف الفرق بين الاتنين ان يكون عندك ميدان تحرير او لا

لو عندك ميدان تحرير يبقى اكيد هتصدق منير لما بيقول:

انا لسه قادر ف الحزن تفرح

و

لو حقدر اغير راح اغير لو مش قادر انا لازم اغير واتغير

و

لو نفتح للدنيا قلوبنا هتدق الاحلام على بابنا

و

حبة صبر حبة حماس يبقى الحلم صوره وصوت

حاجه مهمه جدا جدا جدا : لو صدقت ان جواك ميدان التحرير ده هتلاقيه ان شاء الله هتلاقيه

لكن لو اقنعت نفسك ان لا الميدان ده مش جواك ...لو جبتلك كل اللى ف ميدان التحرير اللى ف القاهره دلوقتى عشان يقنعوك مش هتقتنع بردو

حاجه صغيره : لو مشيت ورا نفسك هتتعب كتيير ... لكن لو نفسك مشيت وراك حترتاح كتييير

\

بجد انا تعبت اوى
ايه الى بيحصل ده

» مقارنة من قلب ميدان التحرير
» كنتاكى ميدان التحرير
» دعوه للفشل والجهل!!!!!!!!!!!!!!!
» ميدان التحرير سقطت شرعيتك
» النقيب ماجد بولس أسد ميدان التحرير !!!