من أروع ما كتب الشاعر احمد فؤاد نجم

نؤيد سيادتك لفترة جديدة نكمل خلالها المسيرة السعيدة
و بالمرة فيها نبيع الحديدة مفيش حاجة تانية نبيعها خلاص
*****

نؤيد سيادتك لأجل المزيد من اللي تحقق بفضلك أكيد
بقينا خلاص ع الحميد المجيد و ربك لوحده ف ايده الخلاص
*****

نبايع سيادته ولا حد غيره كفايا علينا نبرطع في خيره
و نوم شعب مصر العظيمة و شخيره يقول للحرامي ما تسرق كمان
*****

نبايع سيادته وابنه وحفيده مفيش زي فكره قديمه و جديده
خرابك يا مالطة حيحصل بايده ومين فيكي يعني بيسمع آذان
*****

نبوس ايد سيادتك و رجلك كمان تخليك معانا يا ريس عشان
وجودك ضرورة فرضها الزمان و من غير وجودك حقيقي نضيع

*****

دي مصر بتاعتك و احنا ضيوفك كفايا علينا يا ريس نشوفك
و عاذرين سيادتك و فاهمين ظروفك عليك بس تؤمر و احنا نطيع
*****

في جزمة سيادتك كلابك يبوسوا و فوق الغلابة بجزمهم يدوسوا
و شعبك ليلاتي يا ريس غموسه مذلة و مهانة و حوجة و مر

*****

لكن يعني ما دمنا شعب انتساب و دايما وأبدا ف حالة غياب
متعملش لينا يا ريس حساب دي عزبة سيادتك و فيها انت حر
*****

و دستور مدستورش مش فارقة خالص كلام فاضي كله يا فندم بناقص
كفايا علينا الفساد اللي ماصص عرقنا و معشش و ضارب جذوره
*****

و ايه يعني تهري جتتنا البلاوي يوماتي كوارث فضايح رشاوي
كفايا علينا القعاد في القهاوي بنستنى لما الوريث ييجي دوره

*********************

ودي كمان

اسمها

ده شعب فقري

نظراً لأن النعمة فاقت حدها
ولأننا مش قدها
ولأن فعلا انجازاتك
فوق طاقتنا نعدها
ولأننا غرقنا في جمايل
مستحيل حنردها
نسترحمك.. نستحلفك
نستكرمك.. نستعطفك
ترحمنا من طلعة جنابك حبتين
عايزين نجرب خلقة تانية
ولو يومين
اسمع بقي
إحنا زهقنا من النعيم
ونفسنا في يومين شقا
عايزين نجرب الاضطهاد
ونعوم ونغرق في الفساد
بيني وبينك حضرتك
دا شعب فقري ما يستحقش جنتك
أنا عارفه شعب ما ينفعوش
إلا شارون وبلير وبوش
عايز يجرب الامتهان
ويعيش عميل للأمريكان
لإسرائيل -غازه- بيمد
ويومين كمان ويمد نيل
أهو يعني نشرب ميه واحدة
ندوب في بعض
ماء وماء وماء
ونفض سيرة الانتماء
وبلاها نعرة وطنطنة
مستوطنة تبقي البلاد
(متسلطنة بالسرطنة)
إيه اللي خدناه من الكرامة والإباء
كلام.. حبة خطب وكلام
إحنا راهنا علي النظام
ورضينا بخيار السلام
بخيار حنسد عين الشمس بيه
علشان ما يطلعش النهار
ويطلع لمين؟
حبة معارضة مغرضين؟
وحسب بيان السلطة
شلة مأجورين؟
يا عم فضك سيرة
وارضي بقسمتك
دا شعب مش فاهم أكيد
يالا اطرده من رحمتك
وإن كنت غاوي الحكم
خليك مطرحك
حاغطس وأقب وأعود
بشعب يريحك
راضي وعمره ما يجرحك
اخرس وما يسمعش
واعميلك عينيه
مش كل قرش يبص فيه
ما يقولش لأه، وفين، وليه
يضرب ينفض في السليم
وعلي الصراط المستقيم
كل اللي يعرف ينطقه
عاش الزعيم
يحيا الزعيم

زائر

الله عليكى بجد
انا بحب فؤاد مجم
تحسى كدا انو مننا
بجد تسلمى على النقل المميز

انا اعشق كلماته .. لكنى حقيقة لا احب شخصيته ابداااااااااا

كل التقدير

» الى شعبى احمد فؤاد نجم
» فؤاد .. معاك
» الشاعر الكبير وصل
» الشاعر والناى
» القراءة السريعة د فؤاد عطية