حبيتك لإلتزامك (شعر رائع)

موضوع: حبيتك لإلتزامك (شعر رائع) 2009-10-10, 15:38

[حبيتك لإلتزامك . . . . . .. . . . . . . حبيتك لاحترامك
حبيت فيكي التواضع . . . . . . . . . . . . والعزة اللي ف كلامك
مبسوط منك لأنك . . . . . . .. . . . . . إسلامك كل همك
أنا أصلي قابلت بابا . . . . . . . . . .. . . واداني فكرة عنك
وسألته عن طباعك . . . . . . . . . . . . إن كانت يعني هادية
فحكالي عن سماعك . . . . . . . . . . . . لكلامه وانت راضية
وازاي بتسلي نفسك . . . . . . . . . . . . بذكرك وانت فاضية
وحلاوة صوت تلاوتك . . . . . . . . . . . . وازاي بتكوني شادية

وسألته إن كنتي فاهمة . . . . . . . . . . . . معنى كلمة زوجين
قالي هتكونوا ورقة . . . . . . . . . . . . مطبوعة نسختين
غني كنت أو فقير . . . . . . . . . . . . ليك عند بنتي دين
سرك هيكون في بير . . . . . . . . . . . . معرفش مكانه فين
تفضل دايماً كبير . . . . . . . . . . . . في نظرها حبتين
لو جيت بفلوس كتير . . . . . . . . . . . . تطمن جت منين

* * *
هتكون دايماً معاها . . . . . . . . .. . . . سيرتك هتكون هواها
والشوق اللي ف خيالك . . . . . . . . . . . . تلقاه لحظة لقاها
لو جيت زعلان ف مرة . . . . . . . . . . . . إرمي همومك وراها
ومهما شوفت بره . . . . . . . . . . . . مش هتشوف مستواها
واطمن يابني خالص . . . . . . . . . . . . عقلها مافيهوش تفاهة
وزي ما هي بنتي . . . . . . . . . . . . بنت حماتها وحماها

وسألته عن ولادي . . . .. . . . . . . . . منك هيكونوا إيه؟
قاللي هيكونوا عادي . . . . . . . . . . . . فسألته يعني إيه؟!
قاللي العادي إللي كان . . . . . . . . . . . . عند الناس من زمان
العادي بتاع سراقة . . . . . . . . . . . . وحذيفة بن اليمان
العادي بتاع أسامة . . . . . . . . . . . . وابن الحكيم لقمان

ده العادي بتاعنا إحنا . . . . . . . . . . . . بنربي عليه عشان
لو جينا ولا رحنا . . . . . . . . . . . . هنقابل الرحمن
عمرك ما تخاف عليهم . . . .. . . . . . . . . ولادك في الأمان
أنا بنتي هتربيهم . . . .. . . . . . . . . ع السنة والقرآن
هتشوف ابنك بيصحى . . . . . . .. . . . . . مادام سمع الأذان
ينزل في الفجر يقرا . . . .. . . . . . . . . بالسجدة والانسان

هتشوف في حجاب بناتك . . . . . . . . . . . . العفة والإحسان
هتشوف إزاي مراتك . . . . . . . . . . . . هتعينك إنت كمان

وسألته عن حياتك . . . . . . .. . . . . . من قبل الالتزام
قال أتذكر في ليلة . . . . . . . . . .. . . مش فاكر أنهي عام
أذان الفجر أذن . . . . . . . . . . . . وقالتلي سيبني أنام
فدخلت الأوضه جوه . . . . . . . . . . . . أجيب منها الحزام
وعبال ما رجعت تاني . . . . . . . . . .. . . كات رجعت ف الكلام
الله يجازي الشيطان . . . . . . . . . . . . خلاها تقول أنام
بس اطمن خلاص . . . . . . . . . . . . دلوقتي بقت تمام!

* * *
قدملي مكة كولا . . . . . . . . . . . . قاللي اتفضل وسمي
أحسن من سكة كولا . . . . . . . . . . . . صدقني وخدها مني

قلتله طيب ياعمي . . . . . . . . . . . . يسعدني أقولك إني
بطلب بنتك ونفسي . . . . . . . . . . . . تناسبني وترضى عني
راح شادد فجأه لبسي . . . . . . . . . . . . وقلب وشه وسألني

حافظ كم جزء يابني . . . . . . . . . . . . وقاري كم كتاب
احكيلي كده عن مؤت . . . . . . . . . . . . أوغزوة الأحزاب
وسمع كم حديث . . . . . . . . . . . . في الأخذ بالأسباب
وكمان سمعلي آيه . . . . . . . . . . . . ذكرت فيها الدواب
ولو شايفها صعبة . . . . . . . . . . . . قللي بتاعة الذباب
واحكيلي حلم يوسف . . . . . . . . . . . . وبراءة الذئاب
واخواته لما جولوه . . . . . . . . . . . . دخلوا من أنهي باب
واديني فكرة برضه . . . . . . . . . . . . بتقبض كم ثواب
وناوي ازاي تحسن ............ . ... ........أنا شايفك لسه شاب

* * *
وسأل نفسه وسألني . . . . . . . . . . . . هيعوز إيه يعني مني؟
لو عندي كل حاجه . . . . . . . . . . . . وديني مش شاغلني
أحسن لك تنسى بنتي . . . . . . . . . . . . ومهرك مش لازمني
قلتله صبرك ياعمي .. . . . . . . . . . . . وبراحتك امتحني
يبقى اما أسأل تجاوب . . . . . . . . . . . . خليك دايماً فاهمني
سألتك وانت ساكت . . . . . . . . . . . . خليتني أظن ظني
وفضل يسأل واجاوب .... . . . . . . . . وعشان خاطرك عصرني
وظهرت النتيجة . . . . . . . . . . . . وبفضل الله قبلني

قاللي مقبول في نظري . . . . . . . . . . . . مبروك عليك ياسيدي
لكن في نظرها هي . . . . . . . . . . . . نجاحك مش بإيدي
وهي زمانها راجعة . . . . . . . . . . . . من تمرين السويدي
خليك قاعد شوية . . . . . . . . . . . . استنا لما تيجي
هعملك من إيديا . . . . . . . . . . . . كباية شاي صعيدي

* * *
سابني وقعدت أفكر . . . . . . . . . . . . هل ممكن ترفضيني
طاب قولي حتى أفكر . . . . . . . . . . . . مش يمكن تفهميني
وفضل مخي يلاعبني . . . . . . . . . . . . يجيبني ويوديني
وخايف م المقابلة . . . . . . . . . . . . مرعوب بينك وبيني
ودق الباب في ثانية . . . . . . . . . . . . وشوفتك مرة تانية
مش قادر أنسى يومها . . . . . . . . . . . . وفاكر كل ثانية

ونده والدك عليكي . . . .. . . . . . . . . عشان أول لقاء
دخلتي وشوفت وشك . . . . . . . . . . . . عليه نور الحياء
نور والله فعلاً . . . . . . . . . . . . مش نور بودرة وزواء
كان أول مرة أخاف . . . . . . . . . . . . من فتنة النساء
أخلاقك مش عادية . . . . . . . . . . . . وجمالك كان شفاء

* * *
قعدتي جنب والدك . . . . . . . . . . . . وسألتيني وجاوبتك
وفكل مرة أجاوب . . . . . . . . . . . . كنت باشوف ابتسامتك
ف أقول من جوه نفسي . . . . . . . . . . . . يارب أكون عجبتك
وبعد شوية قمتي . . . . . . . . . . . . ندهت عليكي مامتك
ورحتي دخلتي جوه . . . . . . .. . . . . . وراح وراكي والدك
وانا قلت مش مروح . . . . . . . . . .. . . غير لما أكون خطبتك

* * *
وابوكي جاني تاني . . . . . . . . . . . . وقرب من وداني
لابس كرفته سوده . . . . . . . . . . . . وبدله لون فراني
المنظر يعني كله . . . . . . . . . . . . ميدلش ع التهاني
قلتله مالك ياعمي . . . . . . . . . . . من فضلك قول عشاني
عرقي غرقلي كمي . . . . . . . . . . . . سايبني ليه أعاني
قاللي مستني إيه . . . . . . . . . . . . فين إيدك إديهاني
البنت مش موافقة . . . . . . . . . . . . تتجوز حد تاني

كان أول مرة أعرف . . . . . . .. . . . . . إزاي الناس بتفرح
سعادتي كات غريبة . . . . . . .. . . . . . مش ممكن هقدر أشرح
من كتر حبي ليكي . . . . . . . . . . . . نويت أضحي وادبح
رحت اشتريت خروف . . . . . . . . . . . . وكان خروف بينطح
ده أخيراً هبقى جوزك . . . . . . . . . . . . وشجرة صبري تطرح

* * *
خطوبتنا كات بسيطة . . . . . . . . . . . . مكانش فيها زيطة
وفرحنا كان في جامع . . . . . . . . . . . . يعني مش خلطبيطة
ومامتك جت في يومها . . . . . . . . . . . . ورقعت كام سويطة
هاتولي بنتي منه . . . . . . . . . . . . دي مش فاهمة العبيطة
إنه هيخطفها مني . . . . . . . . . . . . وهتوحشني الغتيتة

* * *
صعبت عليا مامتك . . . . . . . . . . . . الموقف كان شديد
لكن فعلاً خطفتك .. . . . . . . . . . . . ورحنا مكان بعيد
فاكرة ولا انتي ناسية . . . . . . . . . . . . أكيد فاكرة أكيد
من يوم ما بقيتي زوجتي . . . . . . . . . . . . وانا متهني وسعيد
معايا ف كل يوم . . . . . . . . . . . . ويوم لؤاكي عيد
عمرك ما دقتي نوم . . . . . . . . . . . . وانا تعبان أو مريض
فلوسي كات بتكتر . . . .. . . . . . . . . والخير عندك يزيد
وعامله ليه دفتر . . . . . . . . . .. . . ومرتبه المواعيد
وبفضل الله قدرتي . . . . . . . . . . . . وجبتيلي الوليد
وبعديها بشوية . . . . . . . . . . . . جبتيلنا عليه يزيد
وبعديه جت سمية . . . . . . . . . . . . وآخرهم كان حميد

بدعيلك كل يوم . . . . . . . . . . . . وأفضل أعيد وازيد
ربيتي عيالي دول . . . . . . . . . . . . ع القرآن المجيد
طول عمرك وانتي صافية . . . . . . . . . . . . قلبك لون الجليد
أخلاقهم مش عادية . . . . . . . . . . . . طلعنلك مش بعيد
وليد دلوقتي ضابط .. . . . . . . . . . . . ومعاه رتبة عقيد
ودعوة قلبي صابت . . . . . . . . . .. . ويزيد أهو مات شهيد
وبنتك صيدلية . . . . . . . . . . . . وحميد أصبح معيد
الله برحم أبوكي . . . . . . . . . . . . راجل من نوع فريد
كل اللي قاله فيكي . . . . . . . . . . . . أنا عشته بالتحديد

عشت معاكي ف حكاية . . . .. . . . . . . . . أحلى وأجمل رواية
حكايتي كات معاك . . . . . . .. . . . . . وحكايتك كات معايا
اديتك كل عمري . . . . . . . . . . . . وهمك كان رضايا
وعمرك خدته منك . . . . . . . . . . . . وقربك كان دوايا
وخلاص العمر راح . . . . . . . . . . . . راحت أيام صبايا
ومسافر رحله صعبة . . . . . . . . . . . . وزادي مش كفايه
مش عاوز أشوف دموعك .. . . . . . . . . . بالذات ف يوم عزايا
أنا عارف إنتي عارفة . . . . . . . . . . . . إن الموت مش نهاية
دي لسة الرحلة طالعة . . . . . . . . . . . . والموت خط البداية
إدعيلي يمكن أوصل . . . . . . . . . .. . . وأشوف هناك حمايا
أنا عارف إنه فيها . . . . . . . . . .. . . محجوزله هناك سرير

وسلامي في النهاية . . . . . . . . . . . . أنا خلصت الحكاية
لو يوم فكرتي فيه . . . . . . . . . . . . إقري شعري وغنايا
وأمانه ف كل مرة . . . . . . . . . . .. . تدعي لي بالهداية
عسى ربي بدعائك . . . . . . . . . . . . يغفر ليا الخطايا]

الله الله بجد عليك يا استاذنا دايما فى نجاح ومواضيع هادفه بجد بتمنى ان كل شاببنا يبقوا بالصوره دى يارب اجعلنا ممن يستمعون القول فيتبعون احسنه

الله عليك اكتر من رائع
وجزاك الله خيرا

هل نقول ميلاد شاعر
ام هو شعر منقول
سلامات يا غالى
تقبل مرورى

حرام عليك يا استاذ عبد السلام عنيا وجعتنى

ممكن من فضلك تغير اللون دة

بجد ربنا يجزيك كل خير ربنا يزيدك

وربنا يهدينا كلنا ...وتقبل مرورى

سلمت يداك يامعلم دبركى يعنى ايه كمبيوتر
بجد روعه مقدرش اقول غير جزاك الله كل خير

جميل جدا الموضوع ده
كل ما اقراه برجع اقراه من تانى

صحيح اللون ياريت يتغير
كل ماحب افتكر حبك اقرا حبيتك لالتزامك
عارف ليه
علشان انا بحبك فى الله

اسف يا جماعه على الخط مكنتش متوقع يظهر بالشكل ده
كل اللى عاجبه بجد الشعر ياخده كوبى على وورد ويغير الفونت واللون اللى انت عايزه
شكر وتقدير للإستاذ عبدالله شعبان واحبك فى الله الذى احببتنى فيه

اقتباس :: كلام جميل بس ما أظنش ان فى بنات بتفكر كدا بس ممكن يكون بس نادر قوى والأ اية

جزااك الله خير

وانا بعتبره من اجمل ما قرات فى المنتديات عن
العلاقات بين الرجل والمراة

لطيف فى الاسلوب

جميل فى الاداء

روعة فى التنظيم
تقبل مرورى اخى فى الله

بحبك في الله
مشكووووووووووووووووووور

» كم أنت رائع ..
» هل انت انسان رائع ؟؟؟؟
» التكيف مع البيئة رائع
» جدال رائع بين ذكر وانثى
» كيف تكون/ي انسان/ة رائع/ة ؟؟