شخبيط لأعز الناس

موضوع: شخبيط لأعز الناس 2011-09-11, 21:44

تعالى بقى !!

دى الكلمه اللى بقولهالك من دلوقت ، ماهو مش معنى إنى طنشت شويه ومش بدور عليك أنت تنسانى خــالص كده وما تجيش....
ده انت من دلوقت ضحكت إصحابى عليّا ، يرضيك !!!!
قالوا عنى مجنونه عشان بحلم بيك من وأنا يدوب قد كدهوووو
ما تسألنيش كدهو دى قد إيــه !!

ماهو أنا أصلى معرفش Smile

تعالى بقى
خلينى أفرح من قلبى بجد وأحس إنى متطمنه ، خلينى أنام وأسابق ساعات صحيانى عشان أنتَ اللى هتصحينى.
وتزعق فيّا بالراحه وتقولى:
_قومى صلى الفجر
وقتها هعمل مقموصه شويه ، بس من جوايا هبقى طايره مالفرحه عشان بتحبنى وعرفت تشكُمنى كويس.

صحيح
قبل ما أنسى ، وأنت جاى هات معاك أحلامى
ايــوااان أحلامى زى ما سمعت كده...

ماهو ما تجيش بإيدك فاضيه
هاتلى بكره حلو ، بكره خير ، بكره أمــان

وعايزه شقه يدوب أوضتين ولا بلاش خليها صاله وأوضه وهقول الحمــد لله...بس بشـــرط
تكون جدرانها متينه قويه
وتستحمل زعلى وزعلــك ، وهزارنا .
والأبواب هتكون شفافه برّاها يتشاف .. جواها أنا وأنت بس اللى نشوفه
نيجى بقى عالسيراميــك والذى منه Smile

عايزه بلاطتين ،، بلاطه انتَ وبلاطه انا
وجدران بيتنا هنلونها بضحكة أهلى وأهلك
لما نتجمع يوم جُمعه على سفرة غدا عملتوا بإيدى.

هو أنا ما قولتلكش!!

يقطعنى ، شكلى نسيــت.
بدات أتعلم إزاى أطبخ.. وإزاى أبقى ست بيت
ويا سعدك يا هناك هتدوق من إيدى اللى عمرك ما دوقته
احم احم .. بلاش أفسر بقى
هسيبهالك مفاجأه

تصدق عمرى ما حلمت بيك
يعنى لحد دلوقت معرفش شكلك، يا ترى هتكون طويل ولا قصير !!
وشعرك لما انعكشهولك هيبقى شكلك عامل ازاى؟
وايدك ، وعينك لما تضحك ويلمعوا...
هيبقى عندك غمازتين!!
يارب يبقى عندك
عشان أبوسهم وأنت نايم قبل ما أحضرلك الفطار
واطلع أجرى قبل ما تصحى وتقفشنــى
ياترى شكلك عامل ازاى !!
وبتعمل ايه دلوقت ..
أكيد نايم ولا حاسس بالدنيا
ولا يمكن سهران بتفكر فى القرده اللى هتحبها وتتجوزها
أيـــوه قرده وستين قرده
ماهى اللى تحبك وتتشاقى وتقعد توصف فيك من دلوقت تبقى قرده ....

قردتـــك ما وحشتــكش !!!

انت وحشتني موت

موضوع: رد: شخبيط لأعز الناس 2011-09-11, 22:07

قردة ؟؟؟؟؟؟؟؟؟؟؟
ههههههههههههههه

الله يوفقكم يارب بس بلاش قرود وقطط وارانب ههههههههه

» شخبيط لأعز الناس
» ومن الناس
» من اي الناس انت
» الى كل الناس
» معادن الناس