عمرنا ما سمعنا تعبير واكل ناسه أو النداء الشهير ياواكل ناسك إلا في التلفزيون
مسلسل صعيدي والتعبير ده لازم يتكرر مرة على الأقل في الحلقة
ورغم إننا لا ننطق هذا التعبير في حياتنا مطلقا
لكنني فكرت بعمق كم هو مناسب لحالنا
إزاي إحنا المصريين لا نستخدم تعبير واكل ناسه
اللي شنق سليمان خاطر في زنزانته إيه؟
واكل ناسه
اللي سجن أيمن محمد حسن ؟
واكل ناسه
ضابط أمن الدولة المريض نفسيا اللي ضيق الدنيا بما رحبت على أيمن
وعلى المخالف للنظام سياسيا
وعلى المفكرين والعلماء وذوي المكانة العالية علميا وسياسيا واجتماعيا؟
واكل ناسه
الوزير اللي حول حياتنا لجحيم وهو بيعبي الملايين وبيدفعنا ضرائب نهبه وسلبه؟
واكل ناسه
قوانين السياحة اللي تخلي ليلتي - أنا المصرية - في الغردقة نصف اقامة 700 جنيه
ونفس الليلة في نفس الفندق لأجنبي ب 30 دولار
وأنا يتقال لي عرض All Inclusive اللقطة الرخيص جدا خاص بالأجانب بس والمصريين لأ
أبقى في بلد إيه؟
واكل ناسه
لما الحاج المصري يدفع مكافأة نهاية خدمته كاملة لأداء ركن الإسلام الخامس
والأرض الصحراوية اللي مطلوب استصلاحها تكون بأحوال وأوراق وأسعار فلكية
وأرض المباني لها مدة سماح للبناء
وإن أعسر المصري - وهو دائما معسر - تنسحب منه
وفي نفس الوقت
الحج للمقيم في أمريكا وأوروبا أرخص مع فارق الدخل
والوليد بن طلال يحصل على أرض استصلاح بشروط صفر وتسهيلات خرافية
ومعظم أراضي البناء في القاهرة وخاصة المواقع الإسترايجية والحيوية ملك لأجانب أو حرامية
يبقى مش بعيد نعمل أغنية
لواكل ناسه
ولأن مصر لي طول عمرها العصب والدم
لازم أساعدكم - مع إنكم مش محتاجين - في تعريف واكل ناسه
اللي حابى الغريب على المصري على أرضنا
واكل ناسه
اللي جعلنا أذلاء في أرض الغربة لأنه مدمن كبسة زي ما سعيد كان مدمن مكرونة
واكل ناسه
اللي حرمنا من مشاهدة كامل أرض بلادنا لأننا لسنا بباسبور أجنبي ومنورناش مصر
واكل ناسه
اللي بيحارب تمام ثورة مصر ويدفع الإصلاحات للخلف
واكل ناسه
اللي سمح بدخول مبيدات مسرطنة وعارف إن شعبه يضم ثلث مصابي العالم بالفشل الكلوي
واكل ناسه
اللي حارم المصريين من مفهوم الأجازة ومدلول الحد الأدنى للأجور وحقوق التأمين الصحي الحقيقي
واكل ناسه
اللي عاوز يحكمنا النهاردة - بعد الثورة - بمفهوم العاطفة واللعب على وتر أنا منكم وإليكم دون قرارات حاسمة وأخد المصريين في حضنه
واكل ناسه
من يشجع استمرار إعلام مسيس في اتجاه واحد
والعصبية عند عرض وجهة نظر تخالف طريقة حكمه
واكل ناسه
اللي إدعوا إن حسني مبارك كان مغيب عن الوضع وإبنه ضحك عليه ومراته أنثى عنكبوت
لكن هو طيب ومهذب وصاحب ضربة وميعرفش حاجة وبيفكرك بقصة جمال عبد الناصر
مكنش يعرف بتعذيب السجون
مكنش يعرف بقتل الإخوان
مكنش يعرف بالتجسس على غرف النوم
إيده نظيفة من قتل المعارضين اللي منهم اصدقاء شخصيين أقرباء في زمن فات
واكل ناسه
نسيان سليمان خاطر
ومذلة أيمن حسن
وعلاج أحمد الهوان
وجنسية إبن رفعت الجمال
وسجن سعد الشاذلي
ورؤية مصريين أذلاء يدعوا أن حسني مبارك "عزيز" قوم ذل
كل ده بيفكرك بإيه؟
إننا فعلا - وإن أنكرنا - بلد واكلة ناسها
معندهاش بطل له كرامة
أي واحد عمل لها حاجة لازم يتذل زمن حتى ينتصر له الله
أو يموت وهو يجتر العلقم واللي عند ربنا لا يضيع
إحنا بلد لا نحترم جنسيتنا على أرضنا
وعلمنا أهلنا الهوان منذ نعومة الأظافر
وأي حق ناخده على أرضنا نعتبره جميلة تستحق الشكر والعرفان
بنهين أنفسنا على أرض بلادنا
وبنطالب العالم باحترام جنسيتنا
ده يجي إزاي؟
إرفع راسك فوق إنت مصري ده مش رتم نغنيه
ده شعور لازم نحسه
على أرضنا وبراها
وأين السبيل لرفع الرأس
ومازالت البلاد تدار بنفس الطريقة العقيمة
ومازال تجاهل المشاكل ودفن الرأس في الرمال والإختيارات المشبوهة وأكل الكبسة الخليجي هو نهجنا؟
من طرف احمد عرفة 2015-07-17, 08:01
موضوع: يعنى ايه واكل ناسه 
