تزين الاكل فن وله أصول ....

موضوع: تزين الاكل فن وله أصول .... 2010-05-27, 00:07

تزيين الأكل من الحاجات اللي بتخلّي شكل أكلك شهي ولذيذ، مش بس كده ده كمان بيعطي انطباع حلو جداً عن الطبق اللي بتقدميه، وزي ما قال المثل الشعبي "العين بتاكل قبل الفم".. علشان كده إحنا النهارده حبينا نقدّم لك عدد نعرفك فيه إزاي تزيّني أطباقك وتبيّني شطارتك وشياكتك في تقديم أكلك...

وعلشان تقدري تعملي أطباق شكلها حلو ومتميّز يبقى لازم تحطي شوية القواعد الأساسية دي قدامك...

1- إنك تستخدمي حاجات طبيعية لتزيين الأكل، وتحاولي على أد ما تقدري إنك تقللي من استخدام الحاجات غير الطبيعية زي مثلا شرائح الليمون البلاستيك؛ لأن الحاجات الطبيعية بتدي شكل أحلى.

2- حاولي دايماً إن الحاجات اللي بتستخدميها في التزيين تكون متناسقة مع نوع الأكل اللي بتقدميه، يعني مثلاً تزيّني طبق السمك بشرائح ليمون، لكن مش معقول إنك تزيني التشيز كيك بالبقدونس؛ لأن ما فيش أي ترابط بينهما.

3- خدي بالك كمان من إن الأطباق اللي بتحتوي على أكثر من مكون إنك تستخدمي فيها حاجات بسيطة في تزيينها، أما الأطباق البسيطة فممكن إنك تعملي لها ديكور معقد شوية.

4- حاولي تعملي بالأكل اللي موجود في الطبق أشكال هندسية، زي الدواير أو أي شكل عشوائي يدي شكل حلو في النهاية؛ زي مثلا لو بتقدمي صدور فراخ مقطعة قطع صغيرة تبقى ترصيهم في الطبق على شكل حرف X، وممكن كمان إنك تسندي شرائح اللحمة على جبل تعمليه من البطاطس الصغيرة المسلوقة، وممكن تعملي تبديل بين الأطوال المختلفة للأكل في نفس الطبق يعني من الآخر نوّعي في طريقة وضع الأكل في الأطباق.

5- اوعي تفتكري إن تزيين أطباق التقديم هو بس اللي بيخلي أكلك يبان بشكل شهي ولذيذ، لكن كمان طريقة ترتيب الأطباق على السفرة، علشان كده يا ريت إنك تحطي الأطباق المرتبطة ببعضها قريبة من بعض.

6- اوعي تخلي سفرتك مزحومة بأطباق كتيرة، وتفتكري إن هي دي الشياكة؛ لأن الزحمة دي ممكن إنها تدي شكل مش حلو على السفرة.

7- في معلومة مهمة جداً يمكن تكوني أول مرة تسمعي عنها، ولكنها مهمة وأساسية في فن تزيين الأطباق، وهي إنه من الأفضل إنك تستخدمي أعداد فردية في الحاجات اللي بتذوّقي بها، وبلاش الأعداد الزوجية، يعني لو هتستخدمي شرائح من الطمام أو الليمون في تزيين أي طبق يبقى الأحسن إنك تحطي واحدة أو ثلاثة أو خمسة وبلاش تحطي اثنين أو أربعة؛ لأن الأعداد الفردية مريحة أكثر للعين.

8- لو عايزة تضيفي شكل جذاب لأطباقك بطريقة بسيطة جداً، يبقى أحسن حاجة إنك تستخدمي طريقة الرش، يعني ممكن ترشي على الطبق حاجات زي البقدونس المفروم أو المكسرات المفرومة أو السكر البودرة أو الكاكاو، وطبعاً ده كله بيكون على حسب مكونات الطبق اللي إنتِ عايزة تزينيه.

ودلوقتي بقى تعالي نتعرّف مع بعض على شوية حاجات ممكن تستخدميها في تزيين أطباقك...

1- الصوص:
الصوص من الحاجات البسيطة اللي ممكن تستخدميها في تزيين حاجات كتير، وميزته إنه سهل ومتوفّر منه أنواع وألوان كثيرة أوي، زي الكاتشاب أو صوص الشيكولاتة بالنسبة للحلويات، وممكن تعملي به أشكال كتيرة على أطباقك، وممكن ترشيه على شكل زجزاج، ولو عندك ميول فنية ممكن تعملي بالصوص أشكال زي قلب أو وردة.

2- الفاكهة:

استخدام الفاكهة في التزيين بيدّي لأطباقك شكل منعش وجميل، والتزيين بشرائح الفاكهة حاجة سهلة جداً، وكل اللي عليكِ إنك تجيبي الفاكهة اللي إنتِ عايزاها وتقطعيها شرائح وتحطيها على طرف الطبق، أو ممكن إنك تستخدمي مجموعة من الفواكه مع بعضها كقاعدة للطبق تحطي عليها صنف الأكل اللي عايزة تقدميه، يعني مثلاً ممكن تحطي شرائح كنتلوب مع الموز والمانجو على الطبق وتحطي عليهم كيكة أو أيس كريم.

3- الخضروات:
الخضروات كمان بيكون لها تأثير حلو أوي على شكل الطبق زي الفاكهة بالضبط، وفيه خضراوات كتيرة ممكن تستخدميها في التزيين زي الجزر والفجل والبنجر.. وفيه أفكار سهلة وبسيطة ممكن تعمليها باستخدام الخضراوات، زي إنك تبشري الجزر أو الفجل أو أي نوع خضار تاني، وتعملي بيهم شكل جبل صغير في وسط الطبق أو على جنب، وكمان ممكن تقطعي الخضار على أربعة وتعملي بيهم شكل وردة مثلاً.

كمان الخضرة زي البقدونس والكرفس والريحان والكسبرة والروز ماري والزعتر من الحاجات اللي بتكون دايماً متوفّرة في أي مطبخ مصري سواء كانت طازة أو ناشفة، والخضرة من الحاجات اللي بتدي طعم حلو ومختلف لأكلك، مش بس كده ده إنتِ ممكن كمان تستخدميهم في تزيين الأطباق، يعني ممكن تحطي أعواد البقدونس على جنب الطبق أو ترشي البقدونس المفروم على الأكل بشكل عشوائي، وصدقيني هيعمل شكل تحفة، وممكن تزوّدي جمال الطبق بإنك تستخدمي الزهور اللي بتنبت مع الأعشاب دي.

ونصيحة مني حاولي تبتكري في تزيين الأطباق؛ يعني ممكن إنك تستخدمي أي نوع خضار عندك في تزيين أطباقك، زي مثلاً إنك تستخدمي حبوب البسلة في عمل صف في وسط الطبق.

4- الجبنة:
ممكن تستخدمي أنواع مختلفة من الجبنة في تزيين الأطباق زي الجبنة الفيتا أو البارميزان أو الجبنة الرومي وكمان الجبنة القريش، وممكن تعملي أشكال مختلفة من الجبنة الشيدر باستخدام القطّاعة اللي بيكون لها أشكال مختلفة واللي بتستخدميها في تقطيع البسكويت.

5- الخبز المحمص:
ممكن تستخدمي الخبز المحمص في تزيين أطباقك، وخصوصاً أطباق اللحمة، وممكن تحطي بعض شرائح الخبز المحمص جنب طبق الشوربة.

وطبعاً لما جينا نحضر لك عدد عن تزيين الأكل ما كنش ممكن ننسى إننا نعرّفك إيه الأدوات اللي المفروض تكون موجودة في مطبخك، علشان تعملي أحلى الأشكال لأطباقك وتخلّي كل الناس تقول لك "إيه الجمال ده"، وعلشان كده عملنا لك جاليري بأهم الأدوات اللي لازم تكون عندك في المطبخ

طريقة التزيين باستخدام الليمون

طريقة التزيين باستخدام الليمون

اغسلي الليمونة كويس وبعدين قشّريها بقشارة الليمون

ممكن تنظّفي الجزء الأبيض اللي على القشرة بالسكينة

قطعي القشرة لشرائح رفيّعة

اربطيها زي الفيونكة

وده هيبقى الشكل النهائي.. وممكن إنك تزيّني بيها طبق سمك مثلاً

طريقة التزيين بالخيار

طريقة التزيين بالخيار

اغسلي الخيار كويس وبعدين اقطعي أطرافه بالسكينة، وابدئي قطّعيه لشرائح بس تكون مايلة شوية

اعملي بالسكينة خط صغير لغاية نص شريحة الخيار

افتحي الشريحة بإيديكِ الاتنين بس كل إيد تكون في اتجاه عكس التانية زي ما هو واضح في الصورة

وده هيكون الشكل النهائي.. وعلى فكرة إنتِ ممكن تعملي نفس الحكاية مع شرائح الليمون والبرتقال

طريقة التزيين باستخدام الجزر

قشري الجزر واقطعي الطرفين بالسكينة وبعدين اقسميها نصفين وقطعيهم بالقطاعة بس مش بتقطعيها للآخر علشان تفضل متماسكة مع بعضها

طريقة التزيين بالبصل الأخضر

أحضري واحدة بصل أخضر واقطعي الجذور بتاعتها بالسكينة

قطّعي الأطراف الخضراء من البصل بالسكينة لشرائح رفيعة جنب بعضها بس خليهم متماسكين

حطي قطع البصل في ميه ساقعة بس مش مثلجة أوي لمدة 30 ثانية لغاية ما تلاقي إن الأطراف الرفيعة تجعدت ولفت على بعضها، وبكده هتلاقي في النهاية شكل وردة

على اسم مصر التاريخ يقدر يقول ما شاء
أنا مصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة حرب
باحبها بعنف وبرقة وعلى استحياء
واكرهها وألعن أبوها بعشق زي الداء

[/size]

يارب اللى بالى بالك يا صفا يقرا

عشان انا شطور فى الاكل

بس موضوعك فعلا استفدت منه كثير

جزاك الله خيرا

انا متأكدة انهم على كفاءة وعلشان اؤكد لك

حاجى اتغدى عندكم بأمر الله

كل الود للجميييييع

» سبعة اشياء يجب الا تمارسها بعد الاكل
» سبعة أشياء لا تفعلهم بعد الاكل والا ... ؟؟؟
» لماذا نهى الرسول عن الاكل والشراب واقفا؟؟؟